Зоз числом бавячох нє маю бриґи, на каждим змаганю их єст по 18 присутних, а нє раз ше случи же аж и вецей, та ше дахто виступи до публики. Успих у прешлей полусезони наисце вельки, находза ше на другим месце на таблїчки, дома прияли лєм єден ґол. То лєм факти котри потвердзую же вредзело робиц, а по шицким будзе требац буц ище упартейши. Циль ФК „Русин” – висша Войводянска лиґа, за цо маю реални шанси, а чому сиґурно допринєше и состав екипи. У екипи преважно млади 20-рочни хлашци, а шицки старши бавяче лєм отримую ровновагу зоз искуством котре нє мож мерац, и котрому чежко парираю процивнїки.
На виберанковей Скупштини ФК „Русин” котра отримана зоз запожнєньом, вибране цале нове руководство Клубу, а поставени єден як найважнєйши циль – остац у лиґи. Дефинитивно же є сполнєти, та аж и превершени. За предсидателя єдногласно вибрани Тихомир Медич, а у составе Управи углавним меновани младши особи, тиж оформена и Роботна ґрупа ширших сотруднїкох.
Дїлованє новей Управи мож спатриц як позитивне и удатне, як по словох Медичових словох, так и по финансийних билансох, котри би вше могли буц векши, алє су вшелїяк лєпши яки були скорей.
– Од кеди ше вибрало нову Управу, ми ше подняли перше ришиц финансиї. Врацели зме длуства, у октобру зме достали порядни средства за спорт зоз Општини и зоз буджету Месней заєднїци Руски Керестур. Попри тим, до нашого буджету зме и приходовали, заробели зме на манифестациї „Днї керестурскей паприґи”, дзе зме предавали печенє зоз рожньох. Ту треба спомнуц и орґанизацию и заробок зоз двох турнирох – Ноцного турнира и Турнира поднїмательох – толкує Медич.
Приоритет бул обезпечиц и стаємних спонзорох, цо ше им удало. Та тераз и попри стаємних средствох зоз локалней самоуправи єст и приватних поднїмательох котри дзечнє потримую їх активносци.
– Ту и потримовка зоз Општини Кула, нєдавно нам поставели слупи, на котри намонтирани рефлектори, дзекуюци котрим зме од наступней часци сезони годни тримац тренинґи и у вечарших терминох. Часто проблем же велї бавяче робя, та им ше чежше орґанизовац – гвари Медич, и предлужує же у цеку и винаходзенє ришеня за санированє трибинох.
– Зоз Општинскей управи у Кули зме нам обецали же у наиходзацих двох, трох рокох, а можебуц и скорей будземе вєдно ришовац проблем трибинох на нашим стадионє Ярашу. Ище нє ришене же на яки способ. Зоз фаховцами ше порадзиме же цо будзе туньше, чи санировац иснуюци трибини, чи правиц нови, а вшелїяк же у плану и закрице – толкує Медич, наздаваюци ше цо скорейшей реализациї того проєкту и цо лєпшому пласману екипи у другей часци першенственей сезони.
РЕЦЕПТ ЗА УСПИХ
Вельку заслугу же Русин єшеньску часц закончел у верху таблїчки маю насампредз бавяче, алє и тренер Ранко Делич.
– Екипа Русина посцигла одлични успих у єшеньскей часци першенства и прето сом барз задовольни. Най лєм здогаднєм на час кед ше екипа трапела зоз остава-
ньом у лиґи, з подлим материялним станом… На початку першенства мали зме даскельо нєуспишни стретнуца, но, то зме виправели. Бавяче достали якуш нову енерґию и мотив, та зме на концу завжали друге место – гварел Далич, тренер Русина.
У цеку пауза, кед ше бавяче одпочиваю и догваряю за предстояци стретнуца у ярнєй часци першенства. Тих дньох тренер Делич будзе мац схадзку зоз нововибранима членами Управи Клуба.
– Од кеди вибрани нови чолни людзе Клуба, вельо лєпша атмосфера медзи бавячами. Жадаме и у предлуженю першенства зазначовац добри резултати, а то вшелїяк можеме. Значи, циль нам верх таблїчки, а тиж и же бизме були клуб за приклад шицким у Руским Керестуре, а и околїску – надпомнул тренер.
Бавяче по конєц януара буду на заслуженим одпочивку. Як надпомнул Делич, пририхтованя буду з двох часцох. Базични пририхтованя буду отримани у спортскей гали у Руским Керестуре, а убавйованє екипи будзе на Ярашу.
– Потераз зме мали добре сотруднїцтво зоз компетентнима у спортскей гали, а наздавам ше же порозуменє за нашу екипу будземе мац и з тей нагоди и же достанєме термини за пририхтованя. До початку першенства, значи по штредок марца, плануєме одбавиц 5-6 пририхтуюци змаганя. Вибераме екипи хтори нам буду достойни процивнїки, та и лєпши од нашей, бо нам циль закончиц пририхтованя цо лєпше. То єдини рецепт за добри резултати. Кед слово о помоцнєньох, ище зме ше нїч конкретно нє порадзели – гварел тренер Делич.
АКТИВНО ШЕ РОБИ И ЗОЗ ПОДМЛАДКОМ
Управа роздумовала и о тим же би ше нє зочели зоз проблемом нєдостатку бавячох у наступних рокох, та активно орґанизовани и тренинґи за младши возрости. Дакедишнї фодбалер Дюра Дудаш роби зоз наймладшима когуциками од першей по штварту класу у двох ґрупох. Тренираю два раз до тижня у Спортскей гали и єст их вецей як 20-еро. Зоз старшима дзецми роби Зденко Шомодї, котри у ґрупи ма вецей як 30 хлапцох седмей и осмей класи. Интересантне же дзеци досц заинтересовани за фодбал, на тренинґох ше роби озбильно, а Русин ше може сиґурно наздавац квалитетному подмладку у наступних рокох.
О тим ше склада и Управа же треба штудирац о младших, та тренерови Шомодїйови уплацели семинар, односно покладанє за тренерску лиценцу, же би и Русиново пионире тримали крочай зоз процивнїками.
Попри тим же ше отримую порядни тренинґи зоз дзецми, ту и порядне орґанизованє турнирох и приятельских змаганьох за шицки возрости, цо можебуц и єден з мотивох праве за будуцих озбильних фодбалерох.
