НОВИ САД – Почали активносци на виробку Стратеґиї отримуюцого розвою Городу Нови Сад за период по 2020. рок. Документ будзе облапяц плани за розвой вецей обласцох, як цо то привреда, образованє, здравство, комуналне и инфраструктурне ушоренє, защита животного штредку, култура, а увага будзе пошвецена и зменшованю худобства, гварене вчера на конференциї за новинарох у Городскей хижи.
Шеф Канцелариї за локални економски розвой Городу проф. др Марияна Дукич Миятович гварела же за остатнї пейц роки прейґ тей Канцелариї од донаторох обезпечени коло пейц милиони еври, а же з комплекснєйшу Стратеґию мож обчековац ище лєпши резултати на тим полю.
Представителє Стаємней конференциї городох и општинох (СКГО) визначели же Нови Сад єден з найактивнєйших членох тей Конференциї.
– Нови Сад часто бул перша локална самоуправа хтора у сотруднїцтве з нами реализовала важни проєкти. Гоч то город з наймоцнєйшим и найушореншим буджетом у Сербиї, вше може буц ище лєпши. Починаме вєдно робиц на виробку документу хтори будзе основни инструмент за локалну политику з лєпшима ефектами – гварел помоцнїк ґенералного секретара СКГО Александар Бучич.