НОВИ САД – На перши рок шицких ступньох студийох у академским 2016/2017. року на факултети Универзитету у Новим Садзе годни ше уписац 15 842-йо студенти. Спомедзи нїх 8 169 буду студирац о трошку держави, а 7 673-йо ше буду сами финансовац.
Найвецей бруцошох на основни академски студиї приме Факултет технїчних наукох (ФТН), дзе єст места за 2 474-ох студентох, а за бруцошох на основних фахових студийох єст 160 места. По чишлє местох шлїдзи Филозофски факултет, на хтори ше годни уписац 925 бруцоше. Медзи младима роками популарни Правни факултет, хтори того року ма места за вєдно 680 студентох.
Перши рок основних академских студийох на Медицинским факултету того року упишу 164 студенти – 47 на основни фахово студиї, а на интеґрованих студийох будзе 462 места.
Польопривредни факултет на перши рок основних студийох приме 680 студентох, дзе на основни фахово 60, а на интеґровани студиї 60. Технолоґийни факултет ма места за 255 студентох на основних академских студийох.
За студентох першого року основних студийох Природно-математични факултет (ПМФ) ма 875 места, а на интеґрованих студийох 60 места. На Економски факултет ше годни уписац 855-еро бруцоше, а на Академию уметносцох 208-еро. Факултет спорту и физичного воспитаня (ДИФ) ма 350 места на основних академских студийох и 50 на основних фахових студийох.
До новосадского Универзитету спадаю и Будовательни факултет у Суботици, дзе єст места за 144-ох студентох, Технїчни факултет „Михайло Пупин“ у Зренянину, дзе єст 420 места, Педаґоґийни факултет у Зомборе зоз 235 местами, док Учительски факултет на мадярским язику ма места за 55 бруцошох.