Нєпорозуменє директора и векшинскей власнїци „АБЦ ФУД” пред нєшкайшу Скупштину акционерох

автор зам
802 Опатрене

РУСКИ КЕРЕСТУР – Нєшка на 12 г. у просторийох „АБЦ ФУД” у Руским Керестуре ма буц отримана позaрядова Скупштина акционерох того привредного дружтва, хтору зволал директор фабрики Зоран Булатович. Медзитим, як виявел за Рутенпрес, можлїве же нєшкайша схадзка нє будзе успишна пре нєдостаток кворуму, понеже и векшинска власнїца Виолета Шулеич зволала схадзку Скупштини акционерох, алє за 26. децембер, як гварел Булатович, пре пременки директора „АБЦ ФУД”.

На Скупштини акционерох 9. октобра принєшена и одлука о менованю ткв. „дополююцих заступнїкох Привредного дружтва”, за цо менована и векшинска власнїца фабрики Виолета Шулеич и двоме представителє потенциялного дїловного партнера з Греческей. Аґенция за привредни реґистри (АПР) нє прилапела їх уписованє до реґистру, так же мушела буц знова зволана Скупштина, цо директор и зробел прешлого мешаца, а источашнє и векшинска власнїца прейґ суду глєдала зволованє Скупштини за 26. децембер, на цо Булатович уложел жалбу.

На нєшкайшей схадзки Скупштини акционерох главна точка понїщованє шицких одлукох принєшених на схадзки порядней Скупштини акционерох „АБЦ ФУД”, отриманей 9. октобра того року, алє нє и точки дньового шору хтори предложела векшинска власнїца – о менованю дзепоєдних директорох и заступнїкох.

– И на прешлей Скупштини сом гварел, а и надалєй думам же то нє по законє, бо є у процивносци з Планом реорґанизациї, понеже су у нїм нє меновани. Перше би Одбор поверительох мал дац потримовку тим людзом, то потвердзиц и суд, а аж вец Скупштина акционерох – гвари Булатович и додава же ше векшинскей власнїци тото вироятно поспиши зробиц 26. децембра, на новей схадзки Скупштини акционерох, на хторей плановане и його зменьованє.

До нєпорозуменя медзи директором „АБЦ ФУД” Зораном Булатовичом, котри на тоту функцию наведзени у Планє реорґанизациї прилапеним у Привредним судзе у Зомборе и векшинску власнїцу пришло пре розличне толкованє законских предписаньох вязано за предликвидацию (стечај) и витворйованє Плану реорґанизациї.

– Застарани сом, бо ше нє почитує закон, дзе План реорґанизациї фаза предликвидациї, а нє єй законченє, док Привредни суд и власнїца толкую же предликвидация утаргнута з приношеньом Плану реорґанизациї. Медзитим, у Ришеню пише же то лєм фаза предликвидациї, хтора ше може закончиц лєбо з успишним витворйованьом Плану, лєбо з банкротом – гвари Булатович.

Додава же особа задлужена за провадзенє витворйованя Плану до Суду уж трираз посилала звит о нєпочитованю Плану реорґанизациї, односно же ше нє виплацує поверительох.

– Поверительом уж скоро два мешаци после предвидзеного термину нє виплацени пенєж, бо з цалосного длуства од коло 57 милиони, їм виплацени лєм 6-7 милиони динари. Суд вообще нє бере до оглаяду же постої Одбор поверительох и його предсидатель. Ґу тому, споминани гречески партнер фабрики тераз за услужни роботи длужни коло 52 милиони динари и вироятно и то єден зоз способох уплївованя на мойо дїлованє и зменьованє. Стан у хладзальнї таки же шицко тото на чим сом сновал концепцию за охрану поверительох – пада до води, План реорґанизациї постава бесмислови и пробує ше врациц стари стан – гварел Зоран Булатович пред нєшкайшу Скупштину акционерох „АБЦ ФУД”.

ПОВЯЗАНИ ТЕКСТИ