НОВИ САД – На Лєтнєй бини Руского културного центру (РКЦ) у Новим Садзе (Йована Суботича 8), нєшка будзе 14. Фестивал дзецинскей творчосци Руснацох Войводини „Веселинка”, хтори почнє на 17 годзин з рисиваньом по мурох, а потим уметнїки дзецом потолкую як наставаю ґрафити. Як наявюю орґанизаторе з РКЦ, окреме интересантна будзе циркузка роботня, на хторей дзеци науча єдноставнєйши циркузки схопносци и як ше прави реквизити за циркуз.
И того року за наймладших предвидзени интерактивни музични перформанс „Мистер Твистер”, а на 20 годзин почнє вечарша програма колажного типу, на хторей, як и на пополадньових програмох, буду участвовац домашнї и дзеци з ПУ и вецей наших школох и КУД. Плановане же на „Веселинки” будзе вєдно вецей як 210 учашнїкох.
Аниматоре дзецох буду подобово уметнїки Силвестер Макаї и Боґданка Сопка, кловни зоз Сучасного циркузу „Креативни погон”, Дзецински бабкарски студио РКЦ, Ненад Дюкич як „Мистер Твистер”, та ґрафит-уметнїки Станислав и Даниел Мудрох.
На уходзе кажде дзецко достанє пакецик и бони за ошвиженє, а Фестивал того року ма и гуманитарни характер, понеже участвує у акциї за помоц дзецом з ивалидитетом „Зоз затичку до ошмиху”. Прето орґанизаторе модля шицких нащивительох и учашнїкох же би принєсли и по даскельо пластични затички.
„Веселинка” у Календаре репрезентативних манифестацийох Руснацох Националного совиту, а финансийно ю потримую Министерство култури, покраїнски секретарияти за образованє и за културу, Город Нови Сад, Национални совит Руснацох и дзепоєдни нашо и новосадски установи и подприємства.