НОВИ САД – Нєшка будзе Дзень отворених дзверох Универзитету у Новим Садзе, дзе ше штредньошколци, алє и шицки заинтересовани, годни упознац з можлївосцами за студиранє и дальше усовершованє на факултетох хтори у составе новосадского Универзитету.
Шицки 14 факултети Универзитету у Новим Садзе, у чиїм составе и факултети у Зомборе, Суботици и Зренянину, нєшка, 17. октобра, од 10 до 15 годзин отворя свойо дзвери будуцим студентом.
Нащивителє годни упознац и кампус у хторим, попри седем факултетох, змесцени и студентски центер, завод за здравствену защиту студентох, два студентски доми, студентски ресторан и друге.
Факултети хтори нє у кампусу буду представени у Централним будинку Универзитету (Ректорату), а шицки факултети буду мац своїх представительох на инфо-пултох пред Ректоратом.
На Одсеку за русинистику на Филозофским факултету будзе отримана роботня „Руски за 5 минути” и квиз „Кельо ше познаме”.