РУСКИ КЕРЕСТУР – На Драмским мемориялє Петра Ризнича Дядї нєшка на 20 годзин будзе виведзена младежска представа „Врацим ше по вашо души” Стивена Кинґа, у адаптациї и режиї Владимира Надя Ачима, керестурского Драмского студия „АРТ” Дому култури.
На ютре вечар на Мемориялє госцую Руснаци з Петровцох, з представу „Кров понад главу” Саву Шкобича, у режиї Томислава Раца, а у виводзеню ґлумцох з КУД „Яким Гарди”.
Од пондзелку, 20. априла, на Мемориялє буду виводзени по два представи – пополадню дзецински, а вечар за старших.
Перши з дзецинску представу на пондзелок, на 13 г., наступя мали ґлумци з Руского КУД „Др Гавриїл Костельник” з Кули. Вони одбавя фалат „Маче, любим це як цо качка люби каче” Роберта Такарича, у режиї Александри Лендєр.
Спрам найновших информацийох, представа „Страшидло” дзецох зоз Шиду, з КУД „Дюра Киш”, нє будзе участвовац на Мемориялє пре, як поведзене орґанизатором, нєможлївосц зазберованя дзецох за представу. Представа Шидянох на репертоаре мала буц на пияток, 24. априла.
