КОВАЧИЦА – Нєшка и на ютре у Ковачици будзе роботна схадзка Координациї националних совитох националних меншинох у Републики Сербиї, хторей тераз на чолє предсидателька Националного совиту (НС) Словацох Ана Томанова Маканова.
На дводньовей схадзки представителє националних совитох пририхтаю найзначнєйши питаня вязани за Акцийни план поглавя 23 у предприступних прегваркох з ЕУ, вязаних за витворйованє правох меншинох у образованю, култури, информованю и службеним хаснованю язика и писма.
Як наявене, будзе ше робиц и по ґрупох за спомнути обласци, после чого национални совити формую свойо предкладаня, як за шицки совити, так и за кажди поєдинєчно, хтори буду предочени Роботней ґрупи за Акцийни план Министерства правди, як и другим компетентним министерством.
Спред НС Руснацох на схадзки Координациї буду присуствовац заменїк предсидателя Совиту Йовґен Мудри, член НС Мирослав Кевежди, член Одбору за службене хаснованє язика и писма Деян Загорянски, а єден дзень и членїца НС и предсидателька його Одбору за образованє Мелания Римар.
Найзначнєйши проблеми за нашу заєднїцу хтори буду винєшени на схадзки Координациї, утвердзени на Вивершним одборе НС, штварток, 7. мая.