РУСКИ КЕРЕСТУР – Госц тогорочней Културней манифестациї „Костельникова єшень” будзе познати сербски писатель Светислав Басара, котри на манифестациї наступи нєшка, 6. новембра, на литературно-музичним вечаре на 18,30 годзин у керестурским Ресторанє „Червена ружа”.
Попри творчосци госца, пригодну бешеду на нєшкайшим литературно-музичним вечаре вислови академик Юлиян Тамаш, а буду представени и нови кнїжки наших авторох – „Галов” Ирини Гарди Ковачевич и „Осце и черешнї” Агнети Бучко Папгаргаї”.
О кнїжкох буду бешедовац авторки и рецензенти, а у музичней часци програми наступя Мирослава Даждиу и Мирослав Пап.
Програма „Костельниковей єшенї” на ютре будзе предлужена з промоцию наших нових кнїжкох и музичного компакт-диску „Керестурски штири дзвони”, на 19 г. у виронаучней сали керестурскей церкви.