РУСКИ КЕРЕСТУР – Вчера у парохиї св. оца Миколая у Руским Керестуре преславени Перши дзень Сошествия Святого духа – Русадля, хторе ше преславює три днї. Пред кажду Службу Божу вирни на клєчацо вишпивали молитву Св. духу – Царю Нєбесни.
Нєшка, на Други дзень швета Служби Божо у Катедралней церкви буду по звичайним розпорядку, а мированє преложене за Треци дзень у Водици. Нєшкайша Вечарша Служба Божа будзе лєм у Марийовим святилїщу, у Водици на 19 годзин, а пред тим на 17 годзин з церковней порти руши процесия до Водици.
На ютре, 17. мая, на Треци дзень Русадьох и Завитни дзень, так же Архиєрейску Службу Божу у Водици на 11 годзин буду предводзиц апостолски нунций у Сербиї архиепископ Лучияно Сурияни, наш владика Георгий и други владикове з обидвох обрядох, як и нашо священїки.
На Завитни дзень владика Георгий Джуджар преслави и 15 роки як є пошвецени за владику. По Служби владикове буду мировац, а кадже годзен вжац и обращик, як памятку на тоту рочнїцу нашого владики.
Завитни дзень у Водици у ювилейним Року милосердия будзе одпустове паломнїцтво за вирних зоз шицких парохийох нашого Еґзархату. Источашнє будзе преславена и духовна повязаносц Водици з папску базилику Мария Велька у Риме и заєднїцу Марийових святилїщох Католїцкей церкви. З тим Водица, у одредзених дньох, занавше достава можлївосц даваня подполного одпусту.
На Завитни дзень будзе отворени ювилейни, двастоти рок од першого обявеня у Водици (1817-2017).