– Два раз сом мал понукнуце професийно робиц у познатих ансамблох, двараз сом тото нє прилапел. Першираз то значело безконєчне одсуство зоз дому, други раз пред саму войну, у бувшей нам держави – почина рoзгварку Мими, директор Дома култури у Руским Керестуре.
– Праве тераз ми пейдзешата рочнїца фолклорней дїялносци и роботи у нїм, а видзи ше ми як кед бим лєм праве почал – предлужує Мими… – Було то у седмей класи основней школи кед сом вошол ґу танєчнїком: котри теди у валалє водзел покойни Силвестер Ґача. Почало скоро лєм од силного жаданя указац ше и доказац, а лєм рок старши одо мнє теди госцовали у Чехословацкей. Барз вельо того ме нагнало рушиц по тей драги, а уж о рок сом вошол и до виводзацкого ансамблу, як наймладши. Теди ансамбл творели Душко Ковачевич, його Ирина, Юлин Палїнкаш, НаткА Джуджарова и други… А мнє мило, рошнєм од пихи, бо сом при танцошох зоз вельким искуством. Школовал сом ше попри спомунтого Ґачу и зоз Жарком Миленковичом у тедишнєй „Матки” у Новим Садзе, Милетом Баньцом котри тиж там робел теди кед нам корепетитор бул Саша Попович, нєшка перше мено у „Ґранду”, а знанє сом надбудовйовал и зоз Робертом Клявином, на числених семинарох, школох, лєбо як их уж могло наволац, од Горватскей по Україну.
После законченей керестурскей ґимназиї Йоаким школованє предлужел на Факултету физичней култури, абсолвовал и врацел ше до валалу, ище активнєйше робиц у фолклору, буц там, алє и при фамелиї, супруги Оленки и теди уж народзеней дзивки Ясминки.
– Якош упар зме робели зоз Юлином Рацом Мишковим котри превжал старшу фолклорну ґрупу, а я почал зоз младшима и то тирва и по нєшка – гвари вон. Престал путовац зоз ансамблом, алє є там ище вше, тераз на других роботох и обовязкох нє лєм у ДомЕ култури, алє и У Националним совиту Руснацох, по други раз, обовязкох у култури кулскей општини и числених других.
– Поправдзе, анї сам нє знам кеди прешли телї роки, алє знам и же сом ше огришел о власну фамелию. Супруга Оленка тиж була активна у виводзацкей фолклорней ґрупи, а кед ше народзела и друга дзивка, Ивана, єй остало лєм робиц свойо у Предшколскей установи и воспитовац дзеци и там и дома, у обисцу. Оца, (мнє), роками нє було дома. Думам же аж тераз видзим кельо того ме прескочело, алє нє и супругу. Тераз ше трудзим цо вецей часу врациц и препровадзац зоз унуками Лазаром, уж скоро хлопом, Иваном, Нику и Олеґом. Якош то так вшадзи, кед нє маш часу за власни дзеци, унуком то з души врацаш и то зоз камату… За унукох мушим мац, и мам часу.
– О чим мож роздумовац, предлужує Йоаким Рац, Мими, Кренїцкого по оцови Якимови и мацери Ирини, тиж активних у тедишнїм хору. Цала фамелия.
СОН, КОТРИ ОСТАЛ ЛЄМ ТОТО
После госцованя у Роґашкей Слатини, словенскей банї, Мимийови понукнути професийни анґажман у їх ансамблу, на руководзацих роботох зоз фолклором и робота за супругу Оленку.
– Бул то сон котри то и остал. Теди уж „гирмело” нука у дежави, на шицких бокох. Указало ше як добре же сом то нє прилапел, хто зна цо би було з того… Друге професийне анґажованє ми понукнуте после знїманя єдного филма у Нємецкей и госцованя як члена ансамбла „Большой Донкозакен хор”. Озда сом зразу похопел же би то була, заш лєм превелька жертва, а на ню сом уж нє бул порихтани. Дзеци ме часто нє видзели, ридко кеди на длужей. Озда ше и у мнє дацо преламало. Од теди вше вецей робим у Доме култури и як професийни хореоґраф и за младших, и за старших, алє и як директор Установи – гвари Мими, и предлужує же уж мали и резултати витирвалих укладаньох.
– Як млади кадри ше зявели: Михал Стрибер, Юлин, Чамо, Рамач, Михал Зазуляк, а шицки уж, нажаль, и пошли од нас… Рошню и други кадри на котри о пар роки годно раховац, а о два роки, лєбо дакус вецей, и мнє чека пензия, гоч у култури думам остац и на други способ, покля то годно.
ФАМЕЛИЯ АНСАМБЛОХ
– Сполнєл сом себе давно зарисовану обовязку – витвориц Колектив, витвориц фамелию зоз членох секцийох и ансамблох… Поспишело ше ми. Нє верим сам себе же єст дакого котри то може оспориц. Вше зме були препознатлїви, нє лєм по танцу и шпиву, по шицким, култури справованя, нєсебичней помоци младшим, старшим, препознатлїви на числених вешельох, алє и, по природи стварох, на випровадзаньох… Вше зме були колектив зоз котрим ше пишел нє лєм валал алє и Войводина, Держава котру зме представяли на числених госцованьох. Дом култури то и тераз нє мено установи, то поняце квалитету и доброго одношеня спрам шицких обовязкох – твердзи Мими.
Даскельо роки вєдно з Чамом робели дословно у шицких наших местох и Дружтвох. Велька то була помоц шицким, нашей заєднїци…
Нєшка Мими преподавач на семинарох за руски и українски фолклор и фахови консултант за фолклор у истей обласци. Прешли роки за творенє нових хореоґрафийох, алє гвари же тераз задаток чежши – надпатрац, совитовац и консултовац новши кадри у шицкей тей и такей пробеламтики вязаней нє лєм за скарб, алє и творенє нових танцох, а шицко зоз цильом остац на високей дошлїдносци, квалитету и ориґиналносци творох котри указую на културу националних заєднїцох.
ВРЕДЗЕЛО
– Наймладшого унука, Олеґа, нам народзела дзивка Ивана праве на родзени дзень супруги Оленки и мено достал, так, по бабовим, само ше поскладало. Його шестричка Ника уж рецитує, а ище лєм пред пар роками почала розумлїво бешедовац. Мала є ище вше. Думам же и Олеґа нє заобидзе Дом култури, алє о тим–потим, роздумує наглас Мими. Дзивка Ивана, їх мац, була активна и у Театре и у фолклору, а найвецей посцигла як рецитаторка по числених успихох на смотрох найвисшого уровня, тераз уж и по роботи зоз младима рецитаторами. Дзивка Ясмина тиж зохабела шлїда у фолклору. Маме ше, з мою Оленку, у чим цешиц.
НЇЧ БИМ НЄ ПРЕМЕНЄЛ
– Паметам, приповеда, два наступи пред Титом, єден у Бачкей Паланки, други на Карадьордєве. Теди бул ансамбл Матки у розмирох котри нїґда нє надвишени, препознатлїви по квалитету и репертоаре котри надиходзел и нашу жем. Паметам и госцованє у жемох Бенелукса, Польскей, Чехословацкей, у Италиї, потим Словацкей, України, односно Совєтским Союзу…
Окрем того, приповеда Мими, паметам и участвованє на остатнєй Воєней паради тедишнєй СФРЮ у Беоґрадзе, 1986. року. Наисце ме було вшадзи и нє знам, кед бим ознова починал, чи бим дацо пременєл.
ВРЕДНОСЦ ХТОРА НЄ ВИМЕРА
– Буц часц култури валала, то обераце и нєпреходне. Числени нашо аматере котри прешли Дом култури и тераз присутни и нє лєм на сцени. Пред пар роками, кед моцни запор и буря загрожели горнїм салом у нашим будинку, шицки пришли помогнуц як знаю и можу, и през зволованя…
Виратоване шицко и на час, алє то требало видзиц, ґенерациї котри ше на сценох и бинох анї нє стретали, робели аж пращало. То тото цо дава вредносц нашей роботи и вибудови колектива. Цешим ше и я, и шицки ми цо зме и у тим – гвари Мими.
