БЕОҐРАД – Министер просвити, науки и технолоґийного розвою Срдян Вербич гварел же до Нового року ма буц витворена ґаранция просвитним роботнїком же им будзе злєпшане материялне положенє.
– Просвитни роботнїки треба же би достали помоц, коло того зме ше давно шицки зложели, алє питанє як то виведземе. Сиґурни сом же сполнїме обовязки – поручел Вербич и визначел же просвитни роботнїки поробели свою роботу коло платних класох, хтори ше прави за цали явни сектор.
Вербич додал же направени каталоґ занїманьох, предкладанє платних ґрупох, правилнїк о фаховим усовершованю и напредованю наставнїкох, а тераз будзе проблем тото шицко ускладзиц з другима секторами хтори ше финансую з державного буджету.