ВЕРБАС – Явно-комуналне подприємство (ЯКП) „Комуналєц” з Вербасу информує гражданох же од 1. юлия буду пражнїц лєм канти за шмеце хтори на себе маю налїпку з ознаку того ЯКП.
Як поведзене у Дїловней єдинки „Чистота” ЯКП „Комуналєц”, їх роботнїки кладу налїпки на канти за шмеце хтори гражданє задлужели, а на основи контракту медзи „Комуналцом” и хаснователями услугох постої евиденция о чишлє задлужених кантох. Но, заключене же єст вельо и нєлеґални канти за шмеце, та з ЯКП модля гражданох же би приявели число кантох хтори маю од „Комуналцу”.
Желєни канти за шмеце гражданом подзелєни ище 2003. року, а шицки информациї о задлужованю кантох и налїпки ЯКП гражданє можу достац на число телфона (021) 706-083, лєбо видзиц на сайту www.vrbas.net/info/4822-komunalac-kante-nalepnice.