БЕОҐРАД – У сотруднїцтве зоз Заводом за културу войводянских Руснацох, у Етноґрафским музею у Беоґрадзе 15. авґуста буду отворени Днї рускей култури, а буду тирвац по 28. авґуст.
Днї рускей култури у Беоґрадзе почню з виставу „Обряди преходох у фокусу обєктиву фотоґрафох Будинскових”, потим будзе представена литературна творчосц Руснацох, моноґрафиї о наших танцох и народним облєчиве, а 28. авґуста буду закончени з тематским вечаром „Наука и Руснаци – вчера, нєшка, ютре”.
На програмох Дньох рускей култури у Беоґрадзе буду участвовац Хор „Гармония” з Нового Саду, нашо писателє и рецитаторе, КУД „Жатва” з Коцура, ансамбл Дому култури Руски Керестур и КПД „Карпати” з Вербасу, КУД „Тарас Шевченко” з Дюрдьова, як и нашо науковци.
Цалосну програму и єй учашнїкох мож видзиц на нашей фотоґрафиї.
