НОВИ САД – Вчера на Филозофским факултету Универзитету у Новим Садзе отримана пригодна шветочносц з нагоди Дня Филозофского факултету (ФФ), хтори основани 1954. року, як и Польопривредни, так же є з нїм найстарши факултет Универзитету у Новим Садзе.
На вчерайшей шветочносци присуствовал и покраїнски секретар за високе образованє и наукововиглєдовацку дїялносц проф. др Зоран Милошевич, а з нагоди Дня Факултету уручени и награди найлєпшому младому виглєдовачови и студентом на основних и мастер студийох ФФ. Отримани и Дзевяти медзинародни интердисциплинарни симпозиюм „Стретнуце културох”, на хторим участвовали вецей як 80 виглєдоваче з нашей жеми и иножемства.
– Дзень Факултету представя промоцию найлєпшого цо маме, як и славенє младосци, бо младосц представя будучносц – гварела з тей нагоди декан ФФ проф. др Ивана Живанчевич-Секеруш.
У културно-уметнїцкей програми наступел и „Антония трио”, у хторим граю нашо музичаре – Антония Барна, Владимир Сивч и Петро Голик.
Филозофски факултет нєшка ма три уровнї академских студийох – основни, мастер и докторски, витворює 49 акредитовани студийни програми, на нїм робя 17 одсеки (медзи нїма и за русинистику) и 17 центри. ФФ ше може похвалїц и з вельку, драгоцину библиотеку, хтора по чишлє кнїжкох такой за Библиотеку Матици сербскей.
На ФФ студираю коло 5 500 студенти, робя 308 наставнїки и 85 други заняти, а дипломи на основних, мастер и докторских студийох на нїм дотераз здобули вецей як 22 000 студенти.
