Означени дзень присоєдинєня Войводини ґу Сербиї

автор ртв/зам
928 Опатрене
НОВИ САД – З нагоди 25. новембра – дня кед Велька народна скупштина Сербох, Бунєвцох и других Славянох з Бачкей, Банату и Баранї принєсла одлуку о присоєдинєню Войводини ґу Кральовини Сербох, Горватох и Словенцох, городоначалнїк Нового Саду Милош Вучевич и предсидатель Скупштини Городу Здравко Єлушич, подпредсидатель Покраїнскей влади Дьордє Миличевич, представителє Городского одбору Союзу потомкох борцох Сербиї од 1912. по 1920. рок, як и Националного совиту Бунєвцох, вчера положели венци на Спомин-плочу на Площи шлєбоди, на будинку дзе дакеди бул Готел „Ґранд” у хторим отримана Скупштина.
– Дзень присоєдинєня Войводини ґу Кральовини Сербох, Горватох и Словенцох и нєшка символ єдинства и ключни мотив за функционованє державней, покраїнскей и локалней политики, а то же бизме були позберани коло заєднїцких цильох и идейох, бо лєм так их мож и витвориц. То за нас єден з найщешлївших датумох у историї нашого городу и народу, на хтори зме горди, як и на факт же на Велькей народней скупштини пред 98 роками гласали и жени и же ище теди указани високи ступень демократичносци у нашей заєднїци – гварел з тей нагоди городоначалнїк Вучевич.
Подпредсидатель Покраїнскей влади Дьордє Миличевич визначел же то вельки дзень за шицких гражданох у Войводини и цалей жеми, хтори убудовани до фундаментох Републики Сербиї, бо символизує борбу за шлєбоду и заєднїцтво.
У Сербским народним театру у Новим Садзе вчера вечар отримана и Шветочна академия з нагоди дня присоєдинєня, на хторей присуствовал и предсидатель Сербиї Томислав Николич, други визначни державни, покраїнски, церковни функционере, амбасадоре, представителє дипломатского кору, городох и општинох, културни и явни роботнїки, а бешедуюци на Академиї предсидатель Николич, медзи иншим, гварел же Влади Сербиї предложи же би и 25. новембер учишлєла до державних шветох.
На Велькей народна скупштина Сербох, Бунєвцох и других Славянох з Бачкей, Банату и Баранї 25. новембра 1918. року у Новим Садзе як делеґати присуствовали и Руснаци, а на вчерайшей Академиї предсидатель Покраїнскей влади Иґор Мирович визначел же тоту заставу виткану з виковних сербских снох на тот дзень щиро прилапели и Бунєвци, Шокци, Словаци, Руснаци, Горвати, Нємци, Мадяре.

ПОВЯЗАНИ ТЕКСТИ