НОВИ САД – У Новим Садзе вовторок, 28. юния, шветочно означени Дзень Универзитету у Новим Садзе и 56-рочнїца постояня и роботи тей значней високобразовней установи. На шветочносци за почесного доктора наукох промововани др Кристиян фон Бар, порядни професор Универзитету у Оснабрику (Нємецка) и снователь и директор Институту за правни студиї, а за професорох емеритусох промововани порядни професор Медицинского факултету др Никола Ґруїч, порядни професор Факултету технїчних наукох др Илия Чосич и порядни професор Польопривредного факултету др Боян Срдєвич.
Ректор Универзитету у Новим Садзе др Душан Николич на шветочносци визначел же тота образовна институция посцигла окремни успихи у дотерашнєй роботи – студенти успихи на рижних европских и шветових змаганьох, Универзитет постал шедзиско Заєднїци державних универзитетох Сербиї, а за його розвой значне и будованє науково-технолоґийного парку, цо тераз у другей фази.
На шветочносци у амфитеатре централного будинку Универзитету присуствовали городоначалнїки штирох городох дзе Универзитет ма свойо факултети – Нового Саду, Зомбора, Зренянину и Суботици, державни секретар у Министерстве просвити Влади РС др Зоран Лужанин, покраїнски секретар за високе образованє и наукововиглєдовацку дїялносц др Зоран Милошевич, предсидатель Сербскей академиї наукох и уметносцох академик Владимир Костич, предсидатель Матици сербскей др Драґан Станич, деканє факултетох новосадского Универзитету, ректоре державних универзитетох у Сербиї и други госци.
Як гварене на шветочносци, тот „моцни державни” Универзитет ма прейґ 50 000 студентох и потребни фахови кадер, а витворел и добре сотруднїцтво з привреду.
На шветочносци наступел и Оркестер гармоникох Академского КУД Универзитету у Новим Садзе „Соня Маринкович”, як и Хор Универзитету.
