Округли стол о Петрови Кузмякови 1. октобра

автор маф
1k Опатрене

РУСКИ КЕРЕСТУР – Округли стол з тему „200 роки од народзеня Петра Кузмяка” будзе отримани 1. октобра того року (на 10 годзин), а домашня будзе Основна и штредня школа з домом школярох з Руского Керестура, хтора и ноши мено свойого першого школованого учителя – утвердзене вчера на схадзки Роботней ґрупи за орґанизованє тей подїї, хтору оформел Вивершни одбор Националного совиту (НС) Руснацох.

1-Kuzmjak-02

Як догварене, викладаче на Округлим столє буду др Янко Рамач, Дюра Латяк и Микола М. Цап, а будзе приказани и филм о Странянох – Кузмяковим родним месце. Презентацию Странянох и памяткох на учителя Кузмяка у тим месце пририхтую представителє Штреднєй фаховей школи з Попраду у Словацкей, на чолє з директором Васильом Кузмяком.

Пред Округлим столом будзе положене квеце на бисту Петра Кузмяка у школским дворе, а у голу отворена вистава хтору з нагоди тей значней рочнїци пририхтує домашня Школа.

На схадзки Роботней ґрупи хтора вчера отримана у керестурскей Школи присуствовали єй директорка Хелена Пашо Павлович, предсидатель Вивершного одбору НС Желько Ковач, предсидателька Одбору за образованє НС Мелания Римар, член НС Сашо Сабадош, Микола М. Цап, та Любица Няради и Михайло Надь зоз Школи „Петро Кузмяк”.

Витворенє Округлого столу о Петрови Кузмякови резултат Спорозуменя о сотруднїцтве керестурскей и спомнутей школи з Попраду, хторе подписане 7. авґуста 2015. року у Руским Керестуре, а з поштредованьом НС Руснацох.

ПОВЯЗАНИ ТЕКСТИ