Општина Кула розпише окремни конкурси за дотациї керестурским здруженьом

автор зам
883 Опатрене

РУСКИ КЕРЕСТУР – Совит Месней заєднїци (МЗ) Руски Керестур вчера розподзелєл средства за дотациї з месного самодоприносу дружтвеним дїялносцом и здруженьом гражданох, хори вєдно виноша 3 милиони 540 000 динари. Найвекша новосц у тогорочним и будуцим розподзельованю тих средствох же буду опредзелєни прейґ конкурсох хтори за тоту намену пошвидко розпише Општина Кула, понеже месни самодопринос часц консолидованохо општинского буджету. Ґу тому, новосц и же за средства можу конкуровац лєм орґанизациї и здруженя хторим шедзиско реґистроване у Руским Керестуре.

Крем за средства за образованє, дзе керестурскому оддзелєню ПУ „Бамби” опредзелєни 133 000 динари и за Фестивал култури „Червена ружа” орґанизатора Дому култури, хтори вошли до буджетох тих установох, шицки други орґанзациї и здруженя муша конкуровац на будуци конкурси, та так и спортски клуби за 667 000 динари, кельо рочна дотация за спорт зоз самодоприносу и Фонд солидарносци за опредзелєни 240 000 динари. Вєдно за образванє, спорт, „Червену ружу” и Фонд солидарносци опредзелєни милион 440 000 динари.

Пре обласци конкурованя, дзепоєдни здруженя гражданох буду конкуровац за „медийску и туристичну промоцию места”, а дзепоєдни за „дотациї и помоц здруженьом гражданох” и 16 здруженя хторим шедзиско у Керестуре за свойо порядни активносци годни конкуровац за вєдно 2 милиони 100 000 динари. Совит вчера одредзел поєдинєчни суми за кажде здруженє, хтори од 10 000 по 60 000 динари.

Як поведзене, Општина Кула конкурси за дотациї з керестурского самодоприносу розпише пошвидко, цо треба провадзиц на веб-сайту Општини. З прияву будзе требац придац и план трошеня средствох, а до конца рока обовязне придаванє звиту о трошеню достатого пенєжу.

Совит вчера прилапел и ребаланс свойого буджету, хтори у одношеню на перши звекшани за 600 000 динари и тераз цалосни план виноши 13 милиони 306 000 динари. Осем предвидзени инвестицийни роботи у Керестуре и спомнути средства за дотациї войду до ребалансу буджету Општини Кула, хтори наявени за 15. април.

ПОВЯЗАНИ ТЕКСТИ