НОВИ САД – Управни одбор НВУ „Руске слово” усвоєл Правилнїк о Документацийним центре НВУ „Руске слово”, зоз котрим основани нукашнї архив НВУ „Руске слово”, котрого годни хасновац заняти у установи и гражданє.
Документацийни центер НВУ „Руске слово” порушани з нагоди ювилея 75-рочнїци Установи и составени є зоз двох корпусох – у Новим Садзе и у Руским Керестуре.
У Документацийним центре НВУ „Руске слово” будзе пейц секциї:
- Архива шицких друкованих виданьох НВУ „Руске слово” од 1945. року;
- Библиотека Видавательней дїялносци НВУ „Руске слово”;
- Архива фотоґрафийох НВУ „Руске слово”;
- Диґитална архива шицких виданьох и пририхтованьох НВУ „Руске слово”;
- Збирка наградох и припознаньох НВУ „Руске слово”.
Документацийни центер НВУ „Руске слово” ма свой лоґо и печац.
Правилнїк то лєм фундамент, а Документацийни центер ше будзе роками стваряц. Тераз явносци доступни лєм рочнїки друкованих виданьох и часц диґитализованей архиви на сайту, на тим ЛИНКУ, а заинтересовани пишу Молбу котру подноши директорови Установи (boris.varga.direktor@gmail.com).