НОВЕ ОРАХОВО – У Новим Орахове вчера, 18. априла, шветочно отворена Етно-хижа. То автентична валалска хижа, а ораховски нєвладово здруженя ю ушорели так же у нєй представени скарб, култура и традиция Руснацох и Мадярох.
Етно-хижа ше находзи у Улїци Золтана Кодаля, число 2, и єдна є з найстарших хижох у валалє. Власнїк хижи Месна заєднїца Нове Орахово, хтора и инициятор єй претваряня до Етно-хижи.
На вчерайшим отвераню Етно-хижи присуствовали и предсидатель Општини Бачка Тополя Ґабор Кишлиндер, предсидатель Совиту Месней заєднїци (МЗ) Нове Орахово Йожеф Фекеч, секретарка МЗ Гайналка Шипош, велї госци и жителє Орахова.
Спред КУД „Петро Кузмяк” за ушоренє Етно-хижи бул задлужени Владимир Маґоч, котри на отвераню бешедовал о випатрунку рускей хижи дакеди, а коло ушореня рускей часци помагали му и други члени Дружтва.
Попри Етно-хижи, исти дзень у ораховским парку отворене и бавилїще за дзеци, а на отвераню присуствовали и школяре з ОШ „18.октобер”.
