ШИД – На Медзинародни дзень поезиї, восботу, 21. марца, у Лєтнєй владическей резиденциї отримана промоция кнїжки поезиї Зденка Лазора, з назву „Попатрунок”, видатей по руски.
Промоцию орґанизовало Дружтво за руски язик, литературу и културу, у сотруднїцтве зоз своїма секциями у Шидзе и Бикичу, а и з потримовку Одбору литературней манифестациї „Поетски нїтки Меланиї Павлович” з Нового Саду.
Спред Дружтва за руски язик, литературу и културу Лазорову творчосц представела Ирина Папуґа, спред манифестациї „Поетски нїтки Меланиї Павлович” Дюра Латяк, а о кнїжки и Лазоровей творчосци бешедовали и наставнїци Златка Сивч Здравич, Саня Тиркайло, як и сам автор.
Кнїжка вишла у априлу прешлого року по сербски, у виданю Народней библиотеки „Симеон Пищевич” зоз Шиду, а познєйше и по руски, у виданю Дружтва за руски язик, литературу и културу.
Промоциї руского виданя Лазоровей кнїжки плановане отримац и у Бачинцох и у Заводзе за културу войводянских Руснацох у Новим Садзе.
На соботовей програми Ирина Папуґа представела и даскельо найновши виданя Дружтва за руски язик, литературу и културу.
