КОЦУР – У Доме култури у Коцуре пондзелок, 13.априла, отримана музично-змагательна манифестация за дзеци з назву „Шпиваночка”, на хторей того року участвовали коло 40 дзеци з 26 шпиванками. Змагали ше зоз шпиванками по руски, сербски и по мадярски шпиванки, хтори сами вибрали и навежбали, а наступели як солисти и у ґрупох.
Шицких шпивачох провадзел Тамбурови оркестер КУД „Жатва”, под руководительством Любомира Сакача Андия, а шпивачох оценьовал жири у составе мастер-музични уметнїк Дмитрий Цап, та нашо познати шпиваче Саня Полдруги и Михайло Будински.
Шпиванче були подзелєни до трох катеґорийох и у катеґориї хлапцох победзел Михаел Скубан зоз шпиванку „Дай нам боже добри час”, у катеґориї дзивчатох победзела Ана Мария Тамаш зоз шпиванку „А од Прешова”, док за найлєпшу ґрупу преглашена ґрупа хтору творели Алиса Мезеї, Михаела Горняк и Оля Хромиш, котри шпивали „Дармо Яничку”.
Од орґанизатора – коцурского КУД „Жатва” – шицки учашнїки достали подзекованя, а побиднїки достали и ЦД з наших фестивало „Червена ружа” и „Ружова заградка”, хтори обезпечел Радио Нови Сад.
У ревиялней часци, под час зашеданя жирия, наступели шпиваче Аня и Алиса Мезеї, котри шпивали по мадярски, та Марґарета Тамаш, Ивана Малїк, Марко Буїла, Дарина Михняк и Хор „Цукрики”.
