РУСКИ КЕРЕСТУР/РАКОШКЕРЕСТУР (МАДЯРСКА) – У Ракошкерестуре, блїзко при Будимпешти, 19. и 20. авґуста отримане Стретнуце Керестурох, а тераз уж традицийно, на нїм участвовали и ветеранє Дома култури Руски Керестур.
На Стретнуцу були делеґациї 28 Керестурох зоз Мадярскей, Румуниї, Словацкей, України и зоз Сербиї, а зоз музичнима точками и танцом ше представели 20 Керестури. Руски Керестур пияти раз участвує на тим стретнуцу, а того року ветеранє Дома култури виведли два новши хореоґрафиї, хтори на наступох вше одлично прилапени – „Вербунґ на Горнїци“ и „Ильков танєц“.
Шлїдуюцого, 2017. року, 18. по шоре Стретнуце Керестурох будзе отримане од 10. по 13. авґуст у Шайокерестуру, на сиверовостоку Мадярскей.
Змесценє и костиранє за наших ветеранох обезпечели орґанизаторе, а за други трошки ше остарал Дом култури, Месна заєднїца Руски Керестур, як и сами ветеранє.
