РУСКИ КЕРЕСТУР – На вчерайшей схадзки Управного одбору Рускей матки (УО РМ), хтора отримана у канцелариї Матки у Руским Керестуре, предсидатель РМ Дюра Папуґа винєсол же до Покраїнского секретарияту за културу и явне информованє за идуци рок конкуроване за участвованє Матки на Тринастим Шветовим конґресу РРЛ, як и за орґанизованє Тринастей Подобовей колониї у Коцуре. За обидва проєкти конкуроване за по 87 500 динари.
До истого секретарияту РМ конкуровала и за 255 000 динари за видаванє свойого глашнїка „Руснак”, а часц средствох за спомнути проєкти Матка планує обезпечиц и з других жридлох.
Вчера на УО винєшена и информация о активносцох РМ у идуцим року, як и у рамикох Шветового конґресу РРЛ, а порадзене и о розподзельованю прикладнїкох глашнїка „Руснак” до одборох РМ по местох.