БАРДЕЙОВ/ПРЕШОВ – Прешлого викенду, 28. и 29. новембра, у спортскей гали у Бардейове и у Театру Йонаша Заборского у Прешове отримани финални вечари 43. Фестивалу „Маковицка струна”, як другого найвизначнєйшого фестивалу у орґанизациї Союзу Русинох-Українцох Словацкей.
На „Маковицкей струни” ше змагаю соло-шпиваче народних шпиванкох, та дуети и триа (без огляду на роки), а пред финалним змаганьом отримани предзмаганя у седем округох Прешовского и Кошицкого краю. Як Рутенпрес дозанава од Миколу Мушинки, у шицких змаганьох того року участвовали коло 200 шпиваче рижних возростох, а за финалну програму вибрани 46 интерпретаторе зоз 33-ома шпиванками.
Тогорочна „Маковицка струна” мала и окремну тему – прадки – так же сценски прикази зоз шпиваньом приказали пейц ґрупи, а на финалних вечарох у Бардейове и Прешове участвовали шпиваче з округох Спишка Нова Вес, Левоча, Стара Любовня, Прешов, Сабинов, Бардейов, Свиднїк, Стропков, Медзилаборци, Гумене, Снїна, та з места Иновци у Собранєцким округу.
Госци Фестивалу були заслужни уметнїки України, шпиваче Марина и Михайло Гардомани з Иванофранковску.