РУСКИ КЕРЕСТУР – На жридлу водоводу у Руским Керестуре при самим концу роботи на поставяню построєня за дезинфикованє води за пице з мишаним дезинфикантом випродукованим з процесом електролизи водовей розпущенїни солї, односно ткв. хлороґен- построєнє, дознава Рутенпрес од директора ЯКП „Руском” Иґора Фейдия.
Попри тим же на жридлу водоводу будзе пречисцовац воду, хлороґен будзе и автоматски дозировац хлор и други потребни материї до води, цо ше тераз роби ручно, а до роботи будзе пущени найвироятнєйше о тидзень, на пондзелок.
Пре одредзени пробни роботи и прикапчованє на водоводну мрежу, на штварток, 12. новембра, у Керестуре єден час нє будзе води.
ЯКП „Руском”, як ношитель тей инвестициї вредней прейґ 13 милиони динари, за єй витворенє прейґ Општина Кула од Покраїнского секретарияту за польопривреду, водопривреду и лєсарство, на основи конкурованя, достал 10 милиони 536 000 динари, а з 20 одсто – з 2 милиони 534 000 динари, у инвестициї участвує Општина Кула. ЯКП „Руском” мало обовязку виплациц ПДВ.
