РУСКИ КЕРЕСТУР/ЗОМБОР – Члени Здруженя паприґарох з Руского Керестура стреду, 2. децембра нащивели Польопривредну совитодавну станїцу Зомбор, хторей на чолє Владимир Сабадош, дзе домашнї за нїх отримали преподаваня.
Фаховци зоз зомборскей Совитодавней станїци 24-ерим Керестурцом отримали шейсц преподаваня вязани за хованє паприґи, а винєсли и свойо искуства о пестованю паприґи у Израїлу.
Було то тогорочне штварте зоз шейсц планованих путованьох пре фахове усовершованє, а члени Здруженя паприґарох их витворюю на основи достатих средствох од Покраїнского секретарияту за польопривреду, водопривреду и лєсарство. На основи конкурсу, Здруженю одобрени 370 000 динари.
У планє ище одход до Нового Саду и Краґуєвцу, а з достатих средствох Здруженє паприґарох купело и опрему за озвученє за преподаваня хтори сами орґанизую, диґитални фотоапарат, як и три мобилни телефони.
На соботу, 5. децембра, члени Здруженя паприґарох буду участвовац на 16. Науково-фаховим совитованю „Сучасна продукция жєлєняви”, хторе будзе у Мастер центру у Новим Садзе у орґанизациї Войводянского дружтва заградкарох и Одбору за валал при Сербскей академиї наукох и уметносцох.
За тераз приявени 24-еро паприґаре, а заинтересовани за одход на тото совитованє ище ше можу приявиц Душици Орос.