РУСКИ КЕРЕСТУР – Здруженє паприґарох Руского Керестура вчера пред вечаром орґанизовало окремни приєм за своїх сотруднїкох – представительох хемийних, осиґуруюцих и других подприємствох, та фахових польопривредних службох котри за паприґарох, заградкарох и других польопривреднїкох вжиме у Керестуре тримали фахово преподаваня и презентациї, а источашнє су и порядни спонзоре манифестациї Днї керестурскей паприґи.
На стретнуцу на Лонґове присуствовали коло 30 представителє тиж тельо подприємствох з рижних крайох Сербиї и Войводини, а домашнї им були члени Управного одбору и дзепоєдни активнєйши члени Здруженя паприґарох.
Присутних привитал и на дотерашнїм и будуцим сотруднїцтве подзековал предсидатль Здруженя Владимир Варґа, поволал их на Днї керестурскей паприґи у авґусту, а то була нагода и за подписованє контрактох о спонзорстве за тогорочну манифестацию.