РУСКИ КЕРЕСТУР – Вчера пополадню у Руским Керестуре отримане перше преподаванє у рамикох Жимскей школи польопривреди Здруженя паприґарох „Capsicum anuum”. Паприґаром ше з тей нагоди представела компания „Супериор” з Велькей Плани, чийо представителє бешедовали о продукованю паприґи на отвореним и гришкох хтори продукователє найчастейше правя.
Небойша Джинович зоз спомнутей компаниї совитовал о гноєню и гварел же треба гноїц и вєшенї кед ше оре, а нє лєм вяри, на цо велї польопривреднїки нє обрацаю увагу. Потим, перши крочай ґу успиху то добре нашенє, прето же пре нєодвитуюце нашенє мож страциц аж 5 000 до 10 000 еври по гектаре.
Од условийох хованя завиши розвой и квалитет пресади, а велька влага, температура од 25 ступнї и нєдостаток слунковей шветлосци идеални условия за розвой хоротох уж у пластенїкох, гварел Джинович.
Паприґа на отвореним тиж подложна хоротом, а праве тото як ше од нїх охранїц вчера найбаржей интересовало продуковательох, понеже тогорочна бактериоза направела вельки чкоди на паприґи у керестурским хотаре.
Преподаваня ше орґанизує пре информованє и совитованє паприґарох о правилней продукциї паприґи и лєгчейшу борбу з проблемами. Як наявели зоз Здруженя, у децембру вироятно будзе шлїдуюце стретнуце, тераз о одкупу паприґи, а Жимска школа будзе предлужена по децемберских шветох.
