РУСКИ КЕРЕСТУР – Найшветочнєйша часц крачунского швета у керестурскей парохиї була вчера, на Перши дзень на Архиєрейскей Служби Божей на 10 годзин, хтору предводзел наш преосвящени владика Георгий Джуджар.
З владиком и трома домашнїма священїками сослужели и пейцме паноцове з наших парохийох, члени Церковного одбору були швичкаре а на Служби шпивал Мишани хор Дому култури и Катедралней церкви, под руководительством Лидиї Пашовей.
Владика у казанї ище раз наглашел смисел и важносц Рождества Христового у историї и у нєшкайшим чаше, та шицким домашнїх и госцом повинчовал щешлїви и радосни Крачун.
По Служби виронаучни дзеци виведли драмску слику „Рождество” а пририхтали их шестри Служебнїци НДМ.
