РУСКИ КЕРЕСТУР – У Велькей сали Дому култури Руски Керестур вчера вечар отримани успишни концерт з нагоди законченя школского рока у Школи за основне музичне образованє (ШОМО) з Кули и єй Оддзелєня у Керестуре, чийо школяре з найвекшей часци и наступели на програми.
Директорка ШОМО Лїляна Барна Никитович на концерту визначела найзначнєйши успихи школярох тей Школи на рижних змаганьох, окреме и керестурского Оддзелєня, як и историйни успих хтори Школа посцигла на Репуличним Фестивалє МБШС.
З керестурского Оддзелєня штверо порядни и єден позарядови школяр освоєли пейц награди, так же директорка окреме представела успихи Иґора Папуґу, Виктора Хрина, Михайла Рацпетия, Ивана Планчак и Данила Йовановича.
З цалей Школи на змаганьох участвовали 19 школяре, з котрих двойо позарядово, и вєдно освоєли 27 награди – 16 перши, 6 други и 5 треци. Шицким награди и припознаня од Школи буду уручени на нєшкайшим концерту найуспишнєйших школярох ШОМО у Кули.
На початку концерту наступел Хор школярох нїзших класох, а потим и школяре од пририхтуюцей по пияту класу на инструментох хтори виучую.
