РУСКИ КЕРЕСТУР – Внєдзелю, 24. априла, у 23. колу Подручней фодбалскей лиґи Зомбор, на Ярашу госцовала екипа ФК „Будучносц” зоз Младенова хтора од Русина страцела з резултатом 3:2 (3:0), а ґоли дали – Деян Павлович, Оґнєн Маркович, Матей Саянкович.
Уж у першей минути госци вируцую лабду до ауту, Стефан Тома уруцує високу лабду до 16 метерох, по Саянковича, исти бавяч нєсебично додава по Деяна Павловича хтори, гоч бавяч охрани, у тим случаю рутински цилює нєбранєну часц мрежи.
Єден од найрозположенших на терену бул Оґнєн Маркович хтори у 30. минути достава лабду на половки терена, преходзи трох бавячох и зоз бицом понад 16 метери змесцує лабду до правого, горнього кута госцуюцого ґолмана. Нє прешло анї 10 минути, а Саянкович у своїм стилу зоз лївого боку виходзи скоро по корнер линию, находзи празни простор коло ґолмана и то було 3:0 за Русин.
У 50. минути тренер Саянкович меня штирох бавячох зоз екипи Русинового подростку. По конєц змаганя госци ше одважели и у двох случайох зменшали резултат, но заш лєм ше им го нє удало виєдначиц.
Русин бавел у составе – Деян Кронич, Стефан Тома, Деян Чернок, Владан Вуйович, Боян Голик (Александар Зорич), Деян Павлович, Неманя Кулич, Янко Кулич (Александар Тома), Дарко Сушич (Лука Иличич), Матей Саянкович, Оґнєн Маркович (Неманя Ковачевич), у замени и – Филип Тома, Деян Будински, Марио Иличич.
У шлїдуюцим колу, 30. априла, фодбалере Русину иду до Приґревици, дзе одбавя змаганє зоз домашнїм „Братсвом 2019ˮ, лидером на таблїчки.