КОЦУР – На преширеней схадзки Културно-просвитного дружтва (КПД) „ДОК” з Коцура, хтора отримана 3. мая, анализовани скорейши и представени активносци хтори дружтво планує витвориц у тим року.
КПД „ДОК” планує видац, лєбо участвовац у видаваню, пейцох кнїжкох – „Кеша” Владимира Сабо-Дайка, „Кукурична кухарка” Александра Деветака, „Конструкциї виреченьох у руским и английским язику” проф. др Михайла Фейси, репрезентативну моноґрафию „Чувар вири, язика и народа – 250 роки Грекокатолїцкей церкви у Коцуре”, як и часопис за културу „Ерато над Коцуром”.
Дружтво участвує и у пририхтованю означованя 250-рочнїци Грекокатолїцкей церкви у Коцуре, а того року преслави 10-рочнїцу Фестивалу гумору и сатири „Коцурска чутка”. Попри тим, Дружтво того року витвори два подобово-литературни конкурси – еколоґийни з тему „Вода драгоцини животни ресурс” и гумористично-сатирични, з тему „Ґенетски инженєринґ”.
Попри дискусиї о учасци на других збуваньох хтори ше будзе отримовац у Коцуре, на схадзки бешедоване и о двох гуманитарних акцийох хтори буду витворени у тим року, о обнавяню драмскей творчосци, школи анґлийского язика, та о дню медийох.