РУСКИ КЕРЕСТУР – У прешлим року, односно прешлей театралней сезони, Руски Народни театер (РНТ) „Петро Ризнич Дядя” витворел три премиєри и 10 репризи своїх представох, як на матичней сцени, так и у наших местох – гвари ше у Звиту о роботи РНТ прилапеним на вчерайшей схадзки Управного одбору (УО) нашого националного театру, отриманей у Руским Керестуре.
Спомнути три премиєри, понеже „Национална страґедия” автора и режисера Славка Ороса премиєрно виведзена початком 2014. рока, а спада то театралней сезони 2013/14. У театралней сезони 2014/15. року РНТ поставел представу „Береме ше, так нам и треба” Яна Лазорика, у режиї Силвестера Дорокхазия и „Як забиц предсидателя” Миру Ґаврана, у режиї Владимира Надя Ачима, чия премиєра була початком того рока.
Остатнї два представи витворени у копродукцийох з КУД по наших местох – у Коцуре, з КУД „Жатва” и у Вербаше, з КПД „Карпати”, так же ше витворює єдно з опредзелєньох Театру о сотруднїцтве и уключованю ґлумцох и театралних роботнїкох з наших местох до националного театру.
Попри на матиченей сцени у Керестуре, спомнути, а и скорейши представи РНТ, прешлого року виводзени у Новим Садзе, Кули, Вербаше, Коцуре и Дюрдьове, а зняти су и Радио-телевизию Войводини.
Як и предпрешлого року, кед после длугшого часу витворене позитивне финансийне дїлованє, 2014. рок РНТ тиж закончел у плусу, и попри тим же главни финанисер – Покраїна, прешлого року опредзелєла средства лєм за єден проєкт. Но, дзекуюци сновательови – Националному совиту (НС) Руснацох, хтори концом прешлого рока видвоєл средства и за Театер, удало ше витвориц плановани 2 премиєри у єдней театралней сезони.
Вкупни приходи РНТ у 2014. року були 2 милиони 235 548 динари, дзе од Покраїнского секретарияту за културу и явне информованє достати милион 700 000, од НС Руснацох 535 000 динари, а з 2013. року були пренєшени 5486 динари. До 2015. року пренєшени 2 015 динари.
На вчерайшей схадзки констатованє же на заєднїцки Конкурс за нови драмски тексти по руски, хтори Театер розписал у сотруднїцтве з вецей нашима институциями, сцигли 5 тексти. Предложене же би у фаховей комисиї за їх оценьованє були тройо члени, дзе РНТ меновал Ирину Гарди Ковачевич, а до орґанох НВУ „Руске слово” и Заводу за културу войводянских Руснацох (ВР), як соучашнїкох у розписованю Конкурсу, буду послати вимоги же би меновали по єдного члена до тей комисиї. Як заключене, резултати Конкурсу би мали буц познати до конца мая того року.
На схадзки УО бешедоване и о терашнїм статусу нашого єдиного професийного режисера котри пре одредзени предписаня вецей нє може буц заняти у РНТ, дочасово бул заняти у Заводзе за културу ВР, а уж єден час є нєзаняти. Порадзене же УО РНТ до Заводу за културу ВР и НС Руснацох пошлє вимогу же би ше заєднїцки пробовало ришиц його професийне анґажованє.