РУСКИ КЕРЕСТУР – Традицийну кошарку червених ружох и стилизовану дзивоцку ладу на тогорочней „Червеней ружи” вчера освоєла млада шпивачка Йована Ноґавица з Руского Керестура, зоз шпиванку „Весела дзивка”, а за найлєпшу нову забавну композицию фахови жири преглашел шпиванку „Шпивам за це”, за хтору музику и текст написала Танита Ходак з Коцура, котра ю и одшпивала, а автор аранжману Златко Русковски.
На змаганю за найкрасши глас того року участвовали лєм дзивчата, а попри побиднїци, змагали ше Ирена Скубан з Вербасу, Леонтина Штефанко з Руского Керестура, Татяна Буила з Коцура, Кристина Гайдук з Керестура, Александра Русковски з Керестура, Марґарета Тамаш з Коцура, Ивана Малїк з Коцура, Марина Роман з Керестура, Наташа Шовш з Коцура, Таня Надь з Керестура, Кристина Афич з Керестура и Ивана Чордаш з Нового Саду.
На фестивалским вечаре вчера, 28. юния, змагали ше и дзевец нови забавни композициї по руски, а другу награду освоєла шпиванка „Лукавство”, композитора и аранжера Мирослава Папа з Нового Саду, на текст Гелени Скубан, а шпивала ю Саня Полдруги. Трецу награду достала композиция „Забудз ти мойо мено”, автора музики и тексту Александра Човса з Нового Саду, у аранжману Морослава Папа, а у виводзеню Лїляни Барна Никитович.
Попри наградзених, на остатнєй манифестациї тогорочного Фестивалу рускей култури „Червена ружа” виведзени композициї „Бал под масками”, авторки музики и тексту Весни Надь (Медєши), аранжера Мирослава Папа, а у виводзеню авторки; „Кед би ме любела”, композитора Мирона Сивча, котри и автор аранжамну, на текст Мирослави Даждиу, а у виводзеню Мирослава Малацка; „Верби и сни”, композиторки Ани Бучко, на текст Агнети Папгаргаї, у аранжману Мирослава Папа, а шпивала ю Геленка Бучко; „Тота любов свята”, композитора Бору Андєлича, на текст Сонї Папуґа Андєлич, аранжера Мирослава Папа, а у виводзеню Андреї Бучко; „Слунко за мойо сни”, автора Михайла Будинския, котри ю и одшпивал, а вєдно з Татяну Будински Дротар написал текст, док автор аранжману за ню Мирон Сивч, и „Влап ме за руку”, цалосного автора Златка Русковския, хтору одшпивала Ана Римар.
Шпивачох нових забавних шпиванкох провадзела и дзивоцка ґрупа Фестивалу, змагательох за найкрасши глас оценьовали Михайло Бодянец, Мирослава Даждиу и Йовґен Надь, а нови забавни композициї Дюра Будински, Татяна Колєсар Ґвоїч и Владимир Семан Зеро.
Пре наявени диждж и подлєйшу хвилю, остатня програма „Ружи” отримана у Велькей сали Дому култури, а нє на отвореней сцени у дворе Школи „Петро Кузмяк”.
Вецей фотоґрафиї мож видзиц на правим боку сайту, у окремней фото-ґалериї з Фестивалу.
