ВЕРБАС – Фестивал поезиї младих розписал конкурс за младих поетох зоз Сербиї и реґиону за участвованє на традицийней смотри талантованих поетох, хтора у Вербаше будзе отримана у остатнїм тижню мая.
На конкурсу можу участвовац поетове до 27 роки старосци з циклусом од 10 нєобявених писньох написаних на сербским, лєбо на язикох националних заєднїцох (з прекладом на сербски).
Писнї, у штирох прикладнїкох, подписани зоз шифру треба послац на адресу: Народна библиотека „Данило Киш” Вербас, Фестивал поезиї младих, Маршала Тита 87, 21460 Вербас, найпознєйше по 1. април 2016. року.
Поетове чийо писнї вибере фахови жири буду участвовац на 48. Фестивалє, хтори наґрадзи найлєпших поетох, а главна награда друкованє кнїжки.
Фестивал поезиї младих источашнє розписал и конкурс за найлєпшого младого маляра за „Палету младих”, хтора будзе у рамикох Фестивалу. Конкуровац можу шицки млади академски маляре до 27 роки старосци. Тема и технїка по шлєбодним виборе, а формат роботи штафелайни.
Заинтересовани авторе треба же би по 1. април 2016. року послали фотоґрафиї циклусу од 10 роботох у електронскей форми, з основнима податками и кратку биоґрафию, на адресу paletamladig@gmail.com Селектор Палети младих Сава Степанов вибере 10 найлєпших авторох, чийо роботи буду виложени на 42. Палети младих.