НОВИ САД – После розпатраня информациї о явних приходох у першей половки того рока, на схадзки 21. октобра, Покраїнска влада од Влади Сербиї вимага же би обезпечела евиденцию о витворйованю шицких явних приходох на уровню општинох, городох и Покраїни. Без спатраня наплацованя тих приходох у Войводини, насампредз порциї на додатну вредносц, як фискално найлєпшого и найвидатнєйшого приходу у Сербиї, нє мож анализовац фискални потенцияли општинох и Покраїни – гвари ше у сообщеню зоз схадзки Покраїнскей влади, з хтору стреду предшедовал Боян Пайтич.
На схадзки констатоване же у першей половки того рока и далєй нє евидентоване наплацованє спомнутей порциї, акцизох при увозу и на царину хтори витворени од порцийних обовязнїкох на териториї Войводини. Покля то нє будзе вименєне, Покраїнска влада и гражданє Войводини нє маю податки о тим же кельо гражданє и привреда Войводини участвую у финансованю розходох на уровню Републики, як анї о тим яка их учасц у цалосним наплацованю. Слово о приходох хтори творя скоро половку буджету Сербиї, гвари ше у сообщеню.
По податкох Управи за трезор, у першей половки 2015. року у Войводини як явни приходи и приманя наплацени 159,2 милиярди динари – за 4 одсто номинално вецей як у истим периодзе прешлого року.
Буджетски средства у тим були 104,6 милиярди, а з цалосней суми наплацених буджетских средствох у Войводини, буджету Сербиї припадли 69 милиярди динари, цо за 4,7 милиярди (6 одсто) вецей як у истим чаше влонї. До буджету Войводини унапрямени 26,8 милиярди динари, та у одношеню на перше полроче 2014., то менєй за 2,6 милиярди, односно за 10 одсто – пише у сообщеню зоз схадзки Покраїнскей влади.
Тиж так, зоз зменшаня плацох у явним секторе, у Войводини витворени 1,8 милиярди динари и тоти средства, у складзе зоз законом, унапрямени до републичного буджету.
Пре зменшанє профитабилносци 11 найвекших компанийох у Войводини, насампредз Нафтней индустриї Сербиї, фискално найвекше реалне опадованє приходох було з порциї на добиток правних особох, та у першей половки рока тото зменшанє виноши 4,1 милиярду динари, лєбо 33 одсто – наведзене у сообщеню з Покраїнскей влади.