НОВИ САД – Скупштина Автономней покраїни Войводини ище скорей вимагала од держави же би нє гашела Явне подприємство „Електровойводина“, цо зробене того тижня, кед ше ю припоєло ґу Електропривреди Сербиї.
Покраїнска влада оштро критиковала тот поцаг и вимага схадзку з Владу Сербиї, на хторей би ше бешедовало о „очиглядним утаргованю даєдних компетенцийох покраїнскей власци“.
Окрем того случаю, Покраїна ма зауваги и на намири же би ше утаргло и дзепоєдни други компетенциї Покраїни, насампредз зоз законами з обласци польопривреди, водопривреди и лєсарства. Ище прешлого року розпочали роботи на вименкох и дополнєньох Закона о водох, Закона о лєсох и Закона о надополнєньох за хаснованє явних доброх, хтори зменшую, а по толкованьох Покраїнскей влади – утаргую дотерашнї компетенциї Войводини.