БЕОҐРАД – И попри зменшаних субвенцийох, польопривреда Сербиї менєй потрафена з мирами шпорованя як други сектори привреди, оценєла стреду, 25. марца министерка польопривреди и защити животного стредку Сербиї Снежана Боґосавлєвич Бошкович.
– Коло 95 одсто польопривредни ґаздовства – хаснователє субвенцийох – нє очкодовани з тима мирами, а тим котрим зменшани даваня стимулациї по гектаре з националного буджету, на розполаганю маю други вигодносци, як цо то субвенционовани кредити – гварела министерка на сходзе о аґрарней политики Сербиї у орґанизациї НИН Фокусу.
По єй словох, главни проблем з хторим ше зочела кед пришла на чоло Министерства то дробни ґаздовства, стара опрема и механїзация, нїзки уровень применьованя науково-технолоґийних досцигнуцох, нїзки уровень урожаю, як и нєсиґурни пласман.