БЕОҐРАД – Дзепоєдни здруженя польопривреднїкох вимагаю же би ше им зоз звишку пенєжох у буджету виплацело по 2 000 динари по гектаре, понеже з обецаних 6 000 достали лєм 4 000 динари.
– Обчекуєме же суфицит у буджету Сербиї, хтори по словох премиєра Александра Вучича виноши 34 милиярди динари, будзе вихасновани за врацанє часци пенєжу хтори вжати зоз субвенцийох, до суми од 6 000 динари по гектаре. Того року виплацени 2 000 динари субвенциї на рошлїнску продукцию и мали буц виплацени ище 2 000 динари, як реґрес за минерални гної, алє то нє сполнєте у подполносци -гварел предсидатель Управного одбору Здружєня „Панчевски польодїлци” Йован Неґован за аґенцию Бета и здогаднул же влонї у децембру, кед субвенциї зменшани на поли, обецане же ше их звекша кед у буджету будзе пенєжи.
Неґован гварел же польодїлци министрови польопривреди Браниславови Недимовичови придали вимогу, а вон обецал же ше будзе закладац за звекшанє аґрарного буджету за 10 одсто у идуцим року. По Закону о буджету, польопривреднїки би з буджету мали достац коло 50 милиярди динари, а достали 40,6 милиярди.
– Утаргованє реґресу за штучни гної неґативно дїйствує на шатву, прето же пре нєдостаток пенєжу ище вше нє виламана кукурица, а жито пошате лєм на 50 одсто планованих поверхносцох и уж прешол оптимални термин за шатву – гварел Неґован.