Студенти польопривреди, роботнїки, руководителє и власнїки ґаздовствох зоз шицких штирох местох Општини Жабель дзекуюци орґанизацї Фонда за розвой польопривреди и того року нащивели Медзинародни саям „Фиерааґрикола” у Верони у Италиї.
На польопривредним Сайме у Верони були коло 1 200 викладаче зоз 35 жемох, хтори представели механїзацию, опрему и статок.
– Треба упознац сучасну продукцию, медзитим, механїзация барз драга за нашо условия, та би конкурси котри понукаю векши средства, вигодни кредити, або безповретни средства помогли польопривреднїком у одлуки инвестовац – гварел Владимир Балїнт зоз Дюрдьова, котри першираз участвовал у нащиви польопривредного сайма котру орґанизовал општински фонд.
– Саям нагода же бизме опатрели нову технолоґию, поинформовац ше о тим же як мож подзвигнуц бруто продукцию на наших польох и на котри способ треба помогнуц малим ґаздовством же би применєли нову технолоґию – гварел Радомир Пударич, предсидатель Управного одбору Фонда.
На сайме у Верони, предсидатель Општини Жабель Чедомир Божич и предсидатель Асоцияциї европских привреднїкох зоз Варезеа Стефано Ґусони подписал спорозуменє о сотруднїцтве.
– Як подписнїки будземе робиц на сотруднїцтве у обласци економиї и култури, як и на запровадзованю координованих активносцох у реализациї партнерских проєктох у складзе зоз политику и програму Европскей униї. Витворюєме предусловиє за инвестованє италиянских подприємствох на териториї Општини Жабель, з цильом пласованя продуктох на локалним тарґовищу, на Балкану и Кавказу, як и на италиянским тарґовищу. Сцеме потримовац розвой партнерских одношеньох медзи локалнима привреднїками у Жаблю и италиянскима подприємствами – гварел Ґусони.
После подписованя контракту предсидатель Божич акцентовал же преношенє знаня и искуствох у обласци розвою и доброго управяня, унапредзенє аґропоживового сектора и економских потенциялох, валоризация, защита природи, културних ресурсох, розвой туристичного потеницялу, заєднїцке участвованє и партнерски одношеня у локалних, националних и програмох ЕУ, лєм даєдни зоз програмох на котрих ше будзе робиц з италиянскима партнерами. Вон тиж визначел же нащиви саймох буду орґанизовани и убудуце, бо барз важне же би польопривреднїки провадзели шветово цеки.
Польопривреднїки зоз жабельскей општини нащивели и Венецию, а то им бул и єдини трошок на тим путованю, бо два ноцованя, костиранє у готелу и уходнїци на Саям за шицких сто путнїкох обезпечела Општина. То седми рок за шором як Фонд орґанизує нащиву польопривредному сайму у иножемстве.