РУСКИ КЕРЕСТУР – У Кули, у ОШ „Петефи бриґада”, нєшка на 15 годзин будзе отримане традицийна програма „Костельниковей єшенї” – Стретнуце рецитаторох, а Двацец друга Културна манифестация нєшка на вечар будзе закончена з манифестацию младих „Дньовка”. На Стретнуцу у Кули буду участвовац коло 20 рецитаторе з векшини наших местох, а нєпоштредни орґанизатор манифестациї Руске КУД „Др Гавриїл Костельник”.
Главна програма 18. мултимедиялней манифестациї младих „Дньовка” нєшка будзе на 20 годзин у Велькей сали Дому култури, а на нєй ше з музику, литературу и танцом представя млади з Керестура, Коцура и Зомбора.
Пред тим, у Голу Дому култури на 18 годзин буду виложени 25 фотоґрафиї младих авторох, вибрани з конкурсу з тему „Контраст”. Три найлєпши фотоґрафиї, хтори вибрал фахови жири, у составе Биляна Дудаш, Ана Костич и Александра Медєши, буду преглашени на главней програми, а побиднїки достаню пенєжни награди.
У Голу будзе и промотивни банер младежскей радио-емисиї Радио Нового Саду „Останьце нашмеяни”, коло хторого ше годно фотоґрафовац з Двома Санями, як и штанд младежского часопису МАК, на хторим годно достац промотивни материял.
По програми, на 22 годзин млади друженє предлужа у Дискотеки „Амадеус”, дзе музику буду пущац „Nation Deejays”.