РУСКИ КЕРЕСТУР – У орґанизациї Управного одбору Здруженя спортских рибарох „Коляк”, на рускокерстурским базену (на боку од „Лонґова”) всоботу, 2. априла, з роботну акцию посадзени прейґ 400 древка, найвецей младнїки сибирского бресту и канадскей тополї.
На тей удатней добродзечней акциї участвовали коло 30 особи, насампредз шицки члени Управного одбору Здруженя рибарох, предводзени з предсидательом Михайлом Пашом, други рибаре, школяре з керестурскей Школи „Петро Кузмяк”, як и дзепоєдни члени Лиґи социялдемократох Войводини, на чолє з народну посланїцу Олену Папуґа, понеже ЛСВ за тоту нагоду подаровала коло 150 младнїки канадскей тополї.
Здруженє младнїки сибирского бресту, як и дзепоєдни други древка, достало од „Водох Войводини”, древка садзени до машински вартаних дзирох, а як гварел Пашо, то перша з тогорочних акцийох Здруженя рибарох, хторе тих дньох вимирело обовязку спрам Општини Кула и годно знова конкуровац за доставанє средствох.
Садзенє древкох предлужене и вчера, на другим боку базену (од валалу), а цалком будзе закончене того тижня, понеже рибаре ту садза ґестинї и явор.
Отримованє роботней акциї на рижни способи помогли Месна заєднїца Руски Керестур, ЯКП „Руском”, приватни подприємства „Комфорт” и „Тина ентериєри”, власнїкох Иґора Раца и Деяна Санковича, та польопривредни продукователь Янко Чизмар Чими.