РУСКИ КЕРЕСТУР – Фестивал рускей култури „Червена ружа” на пияток, 24. юния почнє на 17 годзин з отвераньом вистави подобових роботох Андєлки (Балащак) Античевич з Беркасова. Вистава будзе у голу Дому култури (а нє у Школи „Петро Кузмяк”) и годно ю нащивиц шицки три днї Фестивалу – од 24. по 26. юний – гварене на вчерайшей заєднїцкей схадзки Орґанизацийного и Програмного одбору „Ружи”, на хторей потвердзени програми тогорочного 55. Фестивалу, а буду у дворе Школи „Петро Кузмяк” и у Доме култури.
Манифестация дзецох „Червене пупче” на пияток, 24. юния будзе на 18 г. (на отвореней сцени у Школи), а попри наступу ансамблох з наших местох, на „Пупчу” буду виведзени и 10 нови шпиванки за дзеци. Под час програми предвидзени и аниматоре за дзеци у публики, а по програми за учашнїкох и других креативни роботнї и диско у физкултурней сали Школи.
После „Червеного пупча”, на 21 годзин (тиж у дворе Школи) будзе манифестация „Одгуки з ровнїни”, на хторей наступя шпивацки и музични ґрупи зоз скоро шицких наших местох. Так у 16 точкох наступя аматере зоз Суботици, Нового Орахова, Шиду, Кули, Нового Саду, Бикичу, Вербасу, Коцура, Сримскей Митровици, Руского Керестура и Миклошевцох и Петровцох з Горватскей.
Всоботу, 25. юния, на „Червеней ружи” през дзень буду и вецей провадзаци програми, а на вечар, на 20 г. на отвореней сцени у Школи будзе Шветочни концерт „На штред широкей ровнїни”. На Концерту наступя нашо музично-танєчни ансамбли з Руского Керестура, Дюрдьова и Нового Саду з вибранима точками, а потим госц вечару – КУД „Сербия” з Кули, за хторе на схадзки гварене же будзе приємне квалитативне нєсподзиванє.
После Шветочного концерту, у просторе Фестивалу за розвагу, наступи тамбурашски оркестер „Равница” зоз Суботици.
И тогорочни Фестивал будзе закончени зоз свою найстаршу манифестацию „Червена ружа”, на хторей ше на нєдзелю, 26. юния, у Велькей сали Дому култури буду змагац штернац млади шпиваче-аматере. З кошарку червених ружох ше змагаю 11 дзивки, а за чобольов троме леґинє, а змагателє на „Ружу” приходза з Керестура, Дюрдьова, Коцура, Нового Саду, Сримскей Митровици и зоз Суботици.
У ревиялней часци нєдзельовей програми буду представени забавнми композициї з албуму „Лєм єден погляд” автора Златка Русковския з Керестура, а з провадзеньом окремного оркестру, композициї буду шпивац Анамария Колошняї, Танита Ходак и Саня (Полдруги) Дивлякович.
