РУСКИ КЕРЕСТУР – Вчера дополадня у просторийох керестурского Дому култури почала штиродньова фахово-едукативна роботня, односно семинар за наших хореоґрафох и танєчнїкох. Семинар трима хореоґраф ансамблу Закарпатского народного хору з Ужгороду Микола Мовнар, з асистентку Аню Кохан, професийну танєчнїцу у Закарпатским хору, а корепетитор Юлиян Рамач Чамо з керестурского Дому култури.
На початок семинару до Керестура пришли 12 учашнїки з наших КУД – штверо з Дюрдьова, та по двойо з Вербасу, Коцура, Шиду и Керестура. На семинар були поволани и танєчнїки з дружтвох у Новим Садзе, Бикичу и Нового Орахова.
Фахово-едукативна роботня тирва по пияток, 12. юний, теорийни и практични преподаваня орґанизовани дополадня и пополадню, а як на отвераню семинару гварел госц з Ужгороду Микола Мовнар, наших танєчнїкох упозна з народнима русинскима закарпатскима танцами, крочаями, народним облєчивом, з часцу других танцох у України, а постави з нїма и єден танєц.
Семинар орґанизує Завод за културу войводянских Руснацох, у сотруднїцтве з Националним совитом Руснацох, Школу „Петро Кузмяк”, у чиїм интернату учашнїки змесцени, як и з парохийним Каритасом, дзе им орґанизоване костиранє.
Семинар вчера отворел директор Заводу за културу ВР Серґей Тамаш, котри з тей нагоди визначел же з тоту фахово-едукативну роботню у обласци фолклору почало витворйованє и Спорозуменя о медзиреґионалним сотруднїцтве медзи Войводину и Закарпатску обласцу України, зоз шедзиском у Ужгородзе, хторе подписане у октобре 2013. року.
Тамаш наявел же концом того, лєбо початком идуцого рока будзе орґанизована ище єдна подобна роботня за танєчнїкох и хореоґрафох, на хторей буду преподавац фаховци з Пряшова, зоз Словацкей, а на основи Спорозуменя о медзиреґионалним сотруднїцтве АП Войводини и Пряшовского самоуправного краю у Словацкей.
