КУЛА – На ютре у Кули почина традицийна Музична манифестация „Єшень идзе, душо моя” – Днї Исидора Иси Баїча, а програми викендами буду по 14. новембер.
Манифестацию на чесц Исидора Баїча – єдного з найзначнєйших композиторох з Войводини, родом з Кули, того року ше отримує у знаку 100-рочнїци його шмерци, а на ютре, 24. октобра почнє з концертом соло-шпиваня, хтори отрима мецосопран Милана Вуксан. Програма будзе у Концертней сали Школи за основне музичне образованє (ШОМО) у Кули на 19 годзин.
На нєдзелю, 25. октобра, у сали Културного центру на 19 г. будзе вечар тамбуровей музики, а наступя Вельки тамбурови оркестер „Васа Йованович” КУД „Светозар Маркович” з Нового Саду.
Шлїдуюци викенд, 31. октобра, на програми Вечар камерней музики, на хторим у Концертней сали ШОМО наступи Смикови оркестер з Бачкей Тополї (на 18 г.), а о тидзень потим, 7. новембра, у Сербскей православней церкви у Кули (на 19 г.) будзе Вечар хорского шпиваня, на хторим участвую познати Хор „Ювентус кантат” зоз Зомбора, та домашнї Младежски дзивоцки хор КУД „Дурмитор”.
Музична манифестация Днї Исидора Иси Баїча будзе закончена 14. новембра (собота) з наступом Новосадского камерного составу у Концертней сали ШОМО на 19 годзин.
Орґанизатор Манифестациї Културно-просвитна заєднїца Општини Кула, а покровитель Општина Кула.