Почина седемдньови Русински фестивал

автор зам
902 Опатрене

СВИДНЇК (СЛОВАЦКА) – Нєшка, 25. мая, у Свиднїку, у Словацкей, почина Треци Русински фестивал – фестивал русинскей култури, з поруку „Од Русинох – шицким”. Фестивал тирва по нєдзелю, 31. май, а як и на перших двох, пририхтана мултижанрова програма, з главним опредзелєньом же би ше на найлєпши способ приказало уметносц и културу Русинох у Словацкей, алє и поза єй гранїци.

Од нєшка по пияток у вецей просторох у Свиднїку буду отримани промоциї кнїжкох, театрални представи, дзе участвує и Театер Александра Духновича з Пряшова, на окремних трибинох буду представени Институт русинского язика и култури Пряшовского универзитету, Здруженє Лемкох з Польскей „Руска берза”, а Здруженє интелиґенциї Русинох Словацкей представи кнїжку и документарни филм о там познатим русинским резбарови Андрейови Ґавулови з Чабини.

Главни музично-фолклорни програми Фестивалу буду од пиятку по нєдзелю на сцени у амфитеатре у Свиднїку, дзе през три днї наступя числени домашнї дзецински и музично-фолклорни ансамбли старших, популарни шпиваче, медзи нїма и познати „Кандрачовци” и ПУЛС з Пряшова, алє и госци з иножемства – музично-фолклорни ансамбл „Диканда” з Польскей. На соботу, 30. мая, на Фестивалє наступи и Мишана жридлова шпивацка ґрупа и оркестер КПД „Карпати” з Вербасу.

Русински фестивал, лєбо Фестивал русинскей култури, як го тиж наволую, годно провадзиц и онлайн, на адресох – www.folklorista.sk и www.rusinskyfestival.sk

Треци Фестивал русинскей култури у Свиднїку орґанизую Русинска оброда Словацкей и Место Свиднїк, а з финансийну потримовку Уряду Влади Словацкей-Програми Култура народносних меншинох. Покровитель Фестивалу предсидатель Словацкей Републики Андрей Киска.

ПОВЯЗАНИ ТЕКСТИ