РУСКИ КЕРЕСТУР – З отвераньом вистави малюнкох Милана Колбаса з Ветернику, та манифестацию за дзеци „Червене пупче”, нєшка у Руским Керестуре почина 54. Фестивал рускей култури „Червена ружа”, а тирва по нєдзелю, 28. юний.
Вистава будзе поставена у голу Школи „Петро Кузмяк”, у чиїм просторе буду и шицки манифестациї „Червеней ружи”. Отверанє вистави на 18 годзин, а публика ю годна опатриц през днї тирваня Фестивалу.
Манифестация дзецох, 47. „Червене пупче” почина на 19 годзин и на отвореней сцену у дворе Школи буду виведзени 12 нови композициї за дзеци, а у другей часци програми наступя 15 танєчни и музични дзецински ансамбли КУД з наших местох и з Миклошевцох, з Горватскей. По програми, за шицки дзеци у дворе Школи будзе орґанизовани диско.
На ютре, 27. юния, на 10 годзин на спортских теренох у дворе Школи почнє Керестурски саям, а на вечар, на 20 г. будзе Шветочни концерт, на хторим наступи и професийни ансамбл ПУЛС з Пряшова, зоз Словацкей. После Шветочного, на 23 г. будзе отримани Естрадни концерт, на хторим участвую Цоле (Звонимир Кочиш) и тамбураше „Још ову ноћ” з Нового Саду.
Фестивал на нєдзелю, 28. юния, будзе закончени зоз свою найстаршу манифестацию „Червена ружа” – зоз змаганьом за найкрасши дзивоцки глас и виводзеньом 9 нових забавних композицийох по руски, а почнє на 20 годзин.
Уходнїца за „Червене пупче” 200, за обидва соботово концерти 250, а за нєдзельову програму 200 динари. По манифестацийох, кажди дзень у дворе Школи „Петро Кузмяк” будзе орґанизована розвага зоз „живу” музику.
Портал „Руского слова” и Рутенпресу обяви и окремну ґалерию з фотоґрафиями з манифестацийох „Ружи”.
Орґанизатор „Червеней ружи” Дом култури Руски Керестур, а Фестивал финансийно потримую Министерство култури и информованя Републики Сербиї, Покраїнски секретарият за културу и явне информованє АП Войводини, Покраїнски секретарият за образованє, предписаня, управу и национални меншини-заєднїци АП Войводини, Општина Кула и Месна заєднїца Руски Керестур.
