БЕОҐРАД – По Предлогу Закона о вименкох и дополнєньох Закона о стимулацийох у польопривреди и руралним розвою, хтори обявени на сайту Скупштини Сербиї, предвидзене зменшанє субвенцийох за польопривредну продукцию.
Так, у рошлїнскей продукциї предложене же би стимулация, як „минимални винос”, вецей нє була 6 000 динари по гектаре, алє „до 6000 динари по гектаре”, док у субвенцийох за штучни гной и нашенє то тиж вименєнє на „до 6 000 динари по гектаре”, место „у цалосним вкупним виносу од 6 000 динари по гектаре”, як то було дотераз.
Вименки ше одноша и на премиї за млєко, та у Предлогу член 15. глаши „премиї за млєко витворюює ше у виносу до седем динари по литри”, а дотераз було же минимални винос премиї седем динари.
Анализуюци Предлог буджету за 2016. рок тото вчера потвердзле и член Фискалного совиту Владимир Вучкович, котри гварел же субвенциї за польопривреднїкох буду преполовени и буду менєй як 3 000 динари по гектаре.
– За польопривредних продуковательох плановани коло 8 милиярди динари менєй як у тим року и ясне же ше планує зменшанє субвенцийох по гектаре. Чи през рок Влада витрима прицисок польопривреднїкох, увидзиме – гварел Вучкович и додал же би тото зменшанє субвенцийох требало предписац з окремну уредбу.
Розправа о буджету за 2016. рок у Народней скупштини би мала почац нєшка.